【社區對話日】義工Wendy分享: 12/4 落區‧灣仔

今日有幾樣野,街站派單張反對袋住先、收集反三跑簽名、同街坊傾政改同三跑議題。

有一位街坊,我邀請佢簽名反三跑,但佢話未聽過唔知咩黎,好在佢肯俾時間聽我講野,我就將重點講講講講講,繞過立法會、空牆、舉債、建設費等等、然後佢拎起筆簽名,「聽左你講,我明白左,我簽啦。」謝謝呀,好感動呀!!順利定唔順利?收集一個簽名的同時,其實都有人reject我,唔想聽或急急腳走人,真係要多學習溝通技巧,希望多d街坊肯停低聽兩三句。

另一位街坊我印象更深刻,係一位中年先生,開頭佢唔知咩係三跑,咁我同拍檔就解釋再解釋,然後佢就話︰「點解千幾億唔用黎起公屋?跑道都唔急,點解唔起公屋先呢?」呢位先生了解左第三跑的問題,但佢更關注的係房屋議題,佢係灣仔區街坊,咁我就問佢灣仔的住屋情況,佢話其實灣仔好多劏房,好多人排緊公屋,希望快d上樓,劏房唔止租金貴,有d仲環境差有木蚤,有人唔敢瞓,只好夜晚瞓公園。佢講房屋議題講到有d勞氣,話應該叫d官員同梁振英去劏房住一晚,就知道基層有幾慘!唔好以為基層街坊只著眼當前,呢位先生有遠見的,佢話人口會越來越多,起公屋要多d而且要高d,先可以提供更多單位,應付未來需求。

然後我地就順勢講地產霸權問題、政改、同埋年底區議會選舉,呢位先生無做選民,覺得自己一票無乜用。咁我地就鼓勵佢,每人的一票都係咁重要,我拍檔講得啱︰「有時區議會選舉得票好接近,差幾十票就係當選同落敗之分,所以候選人會重視每一張選票。」我地鼓勵佢去了解候選人的政綱,係咪佢關注的議題,會唔會幫到發聲,佢話︰「我想揀個基層出身的,唔想揀個幾代都係有錢住半山的,唔會明白基層的問題!」 想揀邊個都好,第一步先要登記做選民呀!

今日係第一次來灣仔落區,資料或統計數字我可以上網搵到,但我更想知道的,係街坊切實的感受,住响呢區感覺係點,係要透過傾計由街坊話我知。

image

廣告
本篇發表於 義工分享 並標籤為 。將永久鏈結加入書籤。

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google+ photo

您的留言將使用 Google+ 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

w

連結到 %s